Արցախյան հակամարտությունն արագ լուծել անհնար է

«Սպասել, թե ԵԱՀԿ Մինսկի խումբը կարգավորելու է մեր խնդիրը, սխալ է: Մեր փոխարեն Մինսկի խումբը դա անել չի կարող»,- այսօր լրագրողների հետ հանդիպման ժամանակ ասաց քաղաքագետ Ալեքսանդր Իսկանդարյանը:

Նա նշեց, որ ԵԱՀԿ Մինսկի խումբը երկու նպատակ ունի: Առաջինը` կապ պահպանել երկու պետությունների միջեւ եւ հնարավորություն տալ ադրբեջանցիներին ու հայերին հանդիպելու, շարունակելու բանակցությունները: Երկրորդը` նպատակ ունի գործընթացը միջազգայնացնելու եւ ապահովելու ԱՄՆ-ի, Ֆրանսիայի եւ Ռուսաստանի մասնակցությունը դրան:

Քաղաքագետը նաեւ կարծիք հայտնեց, որ, բացի Մինսկի խմբից, այլ ձեւաչափում հնարավոր չէ պատկերացնել բանակցությունների ընթացքը: Եվ գործընթացի տեղափոխումը մեկ այլ ձեւաչափ կարող է մահացու լինել թե' ադրբեջանցիների, թե' հայերի համար:

Հարցին, թե որքա՞ն է շարունակվելու այս ոչ փոփոխական վիճակը, Ա. Իսկանդարյանը պատասխանեց, թե Արցախյան հակամարտությունն արագ անհնար է լուծել: