Մահացել է Խաղաղության կորպուսի հիմնադիր Սարժենտ Շրայվերը

Հունվարի 18-ին 95 տարեկան հասակում վախճանվել է ԱՄՆ նախաgահ Ջոն Ֆ. Քենեդու զինակից, Խաղաղության կորպուսի հիմնադիր Ռոբերտ Սարժենտ Շրայվերը, տեղեկացնում է France-Presse գործակալությունը:

Ռոբերտ Շրայվերը դեմոկրատական կուսակցության առաջադեմ գործիչ էր, այսպես կոչված` «Քենեդու կլանի» անդամ. 1953-ից նա ամուսնացած էր Քենեդու քրոջ` Յունիսի հետ: Նրանց դուստրը` Մարիան, Կալիֆոռնիայի նախկին նահանգապետ Առնոլդ Շվարցենեգերի կինն է:

Ընտրություններում Քենեդու հաղթանակից հետո, Շրայվերը մտավ նախագահի աշխատակազմ: Հենց նա էլ համարվում է Խաղաղության կորպուսի հիմնադիրը. 1961-ին ստեղծված այս կազմակերպությունն ուներ դաշնային գործակալության կարգավիճակ:

Խաղաղության կորպուսն զբաղվում էր ամերիկացի կամավորներին տարբեր երկրներ ուղարկելով` կառավարական կառույցների, ոչ առեւտրային եւ ոչ կառավարական կազմակերպությունների հետ կրթության, ձեռներեցության, տեղեկատվական տեխնոլոգիաների, գյուղատնտեսության եւ բնապահպանության ոլորտներում համագործակցելու համար: 

Քենեդու սպանությունից հետո Սարժենտ Շրայվերը շարունակեց աշխատանքը նախագահ Լինդոն Ջոնսոնի աշխատակազմում. զբաղվում էր սոցիալական ծրագրերով:

1994-ին Բիլ Քլինթոնը նրան պարգեւատրեց քաղաքացիական անձանց համար նախատեսված ամենաբարձր պագեւով` Ազատության մեդալովԼ ԱՄՆ գործող նախագահ Բարաք Օբաման, ցավակցություն հայտնելով Շրայվերի մահվան կապակցությամբ, նրան անվանել է «ականավոր սերնդի ամենավառ ներկայացուցիչներից մեկը»: