Ամերիկայում ուսանածները միավորվում են

«Շատերը գնում են Ամերիկա, սովորում են այնտեղ, հետ են գալիս, բայց ոչ նրանց, ոչ էլ այդ ծրագրի մասին ոչ ոք չի իմանում: Բայց նրանք ինքնանպատակ չեն գնացել այնտեղ»,- ասաց Հայաստանի ԱՄՆ շրջանավարտների ասոցիացիայի գործադիր տնօրեն Խաչիկ Գեւորգյանը: Ասոցիացիան փորձում է ԱՄՆ կառավարության կողմից ֆինանսավորվող կրթական ծրագրերի շրջանավարտներին միավորել եւ նրանց գործունեությունը հասարակության համար տեսանելի դարձնել:

Գործունեության մեկ տարվա ընթացքում ասոցիացիան կազմակերպել է «Կիսում ենք մեր փորձը» դասախոսությունների շարքը` իրավաբանության, տուրիզմի, հասարակայնության հետ կապերի թեմաներով: Դասախոսությունները վարել են ԱՄՆ կրթական տարբեր ծրագրերի շրջանավարտները, ովքեր ոլորտի գիտակներ են:

«Կիսում ենք մեր փորձը» դասախոսությունների շարքը շարունակվելու է: Նախատեսվում է, որ առաջիկայում դրանք վերաբերելու են առողջապահության ոլորտի բարեփոխումներին, նորագույն տեխնոլոգիաների ներառմանը այդ ոլորտում:

Ստեղծվել է www.usaaa.am կայքը, որը փոքրածավալ սոցիալական ցանց է: Այստեղ գրանցվում են ԱՄՆ կրթական ծրագրերի շրջանավարտները, բացվում են նրանց անձնական էջերը, որտեղ գրվում է նրանց հակիրճ կենսագրությունը, աշխատավայրը, կոորդինատները:

Կայքում տեղադրվում են նաեւ ոլորտին վերաբերող, ինչպեսեւ ասոցիացիայի գործունեության նորությունները:

Ասոցիացիան տրամադրում է նաեւ դրամաշնորհներ անհատներին մինչեւ 3000, իսկ կազմակերպություններին` մինչեւ 5000 դոլարի սահմաններում:

Հունվարի 21-ին տեղի է ունենալու Ասոցիացիայի պաշտոնական բացումը եւ կայքի շնորհանդեսը: