ԲԴԽ–ն այս պահին քննում է 2 դատավորի անձեռնմխելիությունից զրկելու հարցը. մանրամասներ

ՀՀ բարձրագույն դատական խորհուրդն այս պահին քննում է երկու դատավորների անձեռնմխելիությունից զրկելու մասին դատախազության միջնորդությունը։ Այս մասին Sputnik Արմենիային հայտնել են ԲԴԽ-ից` առանց հայտնելու դատավորների անունները։

Ըստ «Իշխանություն» լրատվականի` խոսքը Մասիս Մելքոնյանին և Գևորգ Պողոսյանին է վերաբերում. ՀՀ դատախազությունը միջնորդել է անձեռնմխելիությունից զրկել նրանց` քրեական հետապնդում հարուցելու նպատակով։

Լրատվամիջոցի տեղեկություններով՝ գործընթացի հիմքում պաշտոնեական լիազորությունների չարաշահման վերաբերյալ տեղեկություններն են։Խոսքը, մասնավորապես, վերաբերում է որոշ անձանց նկատմամբ դատական որոշումների կայացմանը, որոնց արդյունքում վերջիններս հնարավորություն են ստացել անարգել լքելու Հայաստանի Հանրապետությունը։

Լրատվամիջոցը հիշեցրել է, որ վերջին շրջանում դատավոր Մասիս Մելքոնյանի անունը պարբերաբար շրջանառվում էր քրեական հեղինակություն համարվող «Չաղ Ռուստամի» գործի շրջանակում։ Դատավորը որոշումներ էր կայացրել նրա նկատմամբ տնային կալանք կիրառելու վերաբերյալ, մինչդեռ Վերաքննիչ քրեական դատարանը բեկանում էր այդ որոշումները՝ կրկին կիրառելով կալանավորումը։ Շրջանառվում էին նաև ենթադրություններ, որ նման որոշումների կայացման հիմքում կարող են լինել կոռուպցիոն բնույթի պայմանավորվածություններ: