Գյումրու ռազմաբազայում նշեցին Ռուսաստանի Ժողովրդական միասնության օրը

Գյումրիում տեղակայված 102-րդ ռուսական ռազմաբազայում այսօր հնչեցին Ռուսաստանի և Հայաստանի պետական օրհներգերը: Շքերթային համազգեստով զինծառայողները շարվեցին շարահրապարակում՝ Ռուսաստանի Ժողովրդական միասնության օրվա կապակցությամբ:

Բարձրաստիճան հյուրերի և բազայի հրամանատարների հանդիսավոր ելույթներից առաջ սպաներն ու զինվորները հանեցին գլխարկները և հրացանների համազարկերի ներքո հարգեցին զոհված ծառայակիցների հիշատակը:

Հայաստանում Ռուսաստանի դեսպան Սերգեյ Կոպիրկինի ելույթից հետո կայացավ պարգևների հանդիսավոր հանձնումը: Ռազմաբազայի զինծառայողները ստացան Արիության շքանշաններ, «Արիության համար» և Սուվորովի անվան մեդալներ, ինչպես նաև պատվոգրեր և հերթական զինվորական կոչումներ:

Տոնական արարողությունն ավարտվեց հանդիսավոր երթով: Շարասյուների անցմանը հարթակից հետևում էին Հայաստանում Չինաստանի և Բելառուսի ռազմական կցորդները: