ԵԱՏՄ-ն և Հնդկաստանը պայմանավորվել են արագացնել ազատ առևտրի համաձայնագրի շուրջ բանակցությունները

Եվրասիական տնտեսական հանձնաժողովի առևտրի հարցերով կոլեգիայի անդամ Անդրեյ Սլեպնևը հանդիպել է Հնդկաստանի առևտրի և արդյունաբերության նախարար Պիյուշ Գոյալի հետ։

Հանդիպման ընթացքում կողմերը քննարկել են Եվրասիական տնտեսական միության և Հնդկաստանի Հանրապետության միջև ազատ առևտրի համաձայնագրի կնքման շուրջ ընթացող բանակցությունները։

Կողմերը պայմանավորվել են շարունակել ապագա համաձայնագրի հիմնական դրույթների համաձայնեցումը։

Միաժամանակ պայմանավորվածություն է ձեռք բերվել բանակցությունների հերթական փուլն անցկացնել նոյեմբերին։ Կողմերը վերահաստատել են գործընթացն արագ առաջ մղելու փոխադարձ շահագրգռվածությունը՝ ԵԱՏՄ անդամ պետությունների և Հնդկաստանի միջև առևտրատնտեսական կապերի հետագա զարգացման նպատակով։