Կատարի ԱԳՆ նախարարն Արաղչիի հետ զրույցում շեշտել է ԱՄՆ-Իրան համաձայնագրի կյանքի կոչման անհրաժեշտությունը

Կատարի վարչապետ և արտաքին գործերի նախարար շեյխ Մուհամմադ բին Աբդ ալ-Ռահման բին Ջասիմ ալ-Թանին հեռախոսազրույց է ունեցել Իրանի արտգործնախարար Աբբաս Արաղչիի հետ՝ դատապարտելով Հորմուզի նեղուցում առևտրային նավերի նկատմամբ իրականացված հարձակումները։ Այս մասին տեղեկացնում է Al Jazeera-ն։

Կատարի արտաքին գործերի նախարարության տարածած հաղորդագրության համաձայն՝ զրուցակիցները քննարկել են վերջին երկու օրերին ԱՄՆ-ի և Իրանի միջև ռազմական լարվածության սրման հետ կապված զարգացումները։

Զրույցի ընթացքում Կատարի վարչապետը նշել է, որ նման հարձակումները խաթարում են փոխադարձ վստահությունը, վտանգի տակ են դնում միջազգային նավագնացության անվտանգությունը և բացասաբար են անդրադառնում տարածաշրջանում անվտանգության ու կայունության ամրապնդմանն ուղղված ջանքերի վրա։

Նա նաև ընդգծել է, որ անհրաժեշտ է շարունակել երկխոսությունն ու դիվանագիտական գործընթացը, ինչպես նաև կյանքի կոչել ԱՄՆ-ի և Իրանի միջև ձեռք բերված ժամանակավոր համաձայնության շրջանակում ստանձնած պարտավորությունները։

Կատարի վարչապետը վերահաստատել է, որ իր երկիրը շարունակում է աջակցել լարվածության նվազեցմանն ու համապարփակ համաձայնության հասնելուն ուղղված բոլոր նախաձեռնություններին՝ դրանք դիտարկելով որպես տարածաշրջանում անվտանգության, կայունության և երկարատև խաղաղության ապահովման կարևոր նախապայման։