ՌԴ և Նոր Նախիջևանի թեմից վարժական հավաքներին մասնակցելու ծանուցագիր են ստացել ևս 2 հոգևորական

Ռուսաստանի և Նոր Նախիջևանի թեմից 25–օրյա վարժական հավաքներին մասնակցելու ծանուցագիր են ստացել ևս 2 հոգևորական։ Այս մասին «Sputnik Արմենիա»-ի հետ զրույցում հայտնել է Մայր Աթոռ Սուրբ Էջմիածնի տեղեկատվական համակարգի տնօրեն Տեր Եսայի քահանա Արթենյանը։

«Ռուսաստանի և Նոր Նախիջևանի թեմից 4 քահանաներ են ծանուցագրեր ստացել, 2-ն արդեն պիտի գնան վարժական հավաքների, 1-ը հիմա զինկոմիսարիատում է, սպասում են որոշման, մյուսին էլ կրկնակի բուժզննում է նշանակվել»։

Հիշեցնենք՝ «Զվարթնոց» օդանավակայանում ԱԱԾ-ն արգելել էր 2 քահանաների վերադառնալ ՌԴ` հոգևոր ծառայությունը շարունակելու համար։ Նրանք Վորոնեժի և Իժևսկի հայկական եկեղեցիների հոգևոր սպասավորներն են։