Լարսը չորրորդ օրն է՝ փակ է. մոտ 1 800 հայկական բեռնատարներ մնացել են անցակետում

Շուրջ 1 800 հայկական բեռնատար ռուս-վրացական սահմանն անցնելու իր հերթին է սպասում Հյուսիսային Օսեթիայի «Վերին Լարս» անցակետի մոտ։ Այս մասին հայտնում է Sputnik Արմենիան։

Ընդհանուր հերթում սպասում է ավելի քան 5 հազար բեռնատար տարբեր երկրներից, որից 1745-ը՝ հայկական պետհամարանիշներով։ Մցխեթա-Ստեփանծմինդա-Լարս ավտոճանապարհի Գուդաուրի-Կոբի հատվածում երթևեկությունն անբարենպաստ եղանակային պայմանների պատճառով ապրիլի 14-ից փակ է:

Վիճակագրության համաձայն՝ օրական «Վերին Լարսով» անցնում է մոտ 150 հայկական բեռնատար։

Հիշեցնենք՝ ռազմավիրական ճանապարհը Հայաստանը Ռուսաստանի հետ կապող միակ ցամաքային ճանապարհն է։