Զախարովան աշխարհաքաղաքական հաշվարկներ է անվանել ԵՄ-ի՝ ՀՀ-ի զինված ուժերին գումար հատկացնելու ծրագրերը

Եվրամիությունը նախատեսում է մոտ 10 մլն եվրո հատկացնել Հայաստանի զինված ուժերին բացառապես Հարավային Կովկասում ապակայունացման աշխարհաքաղաքական նպատակներով։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, գրում է ТАСС-ը։

«Հայաստանի զինված ուժերին աջակցելու համար 10 մլն եվրո հատկացնելու ԵՄ ծրագրերի հետևում, անշուշտ, կանգնած են ԵՄ աշխարհաքաղաքական հաշվարկները՝ իր ապակառուցողական ազդեցությունը տարածել այս տարածաշրջանի, այսինքն՝ Անդրկովկասի վրա։ Դա երևում է Ուկրաինայի օրինակով, որ այսպես կոչված Խաղաղության եվրոպական հիմնադրամը խաղաղության մասին չէ, կայունության մասին չէ, անվտանգության մասին չէ, պատերազմի մասին է, երկրներ հրահրելու մասին է, արյունահեղության մասին է», - ասել է նա։