Տրվել է Երևան-Կապան-Երևան երթուղով կանոնավոր չվերթերի մեկնարկը

Երևան-Կապան-Երևան կանոնավոր ավիաչթվերթերի մեկնարկը տրվել է օգոստոսի 21-ից։ Այս մասին հայտնում է Սյունիքի մարզպետարանը։

«Այսօր առաջին անգամ, ըստ հաստատված չվացուցակի, կայացել են Երևան-Կապան, Կապան-Երևան օդանավով թռիչքները։

Սահմանված ժամանակին Զվարթնոց օդանավակայանից մեկնած ինքնաթիռը վայրէջք է կատարել Կապանի «Սյունիք» օդանավակայանում և ըստ ժամանակացույցի Կապանից մեկնել Երևան»,-ասված է Սյունիքի մարզպետարանի հրապարակման մեջ։

Կապան-Երևան չվերթի օդանավում ուղևորների մեջ են եղել նաև Սյունիքի մարզպետի տեղակալն ու խորհրդականը։

Երևան-Կապան և հակառակ ուղղությամբ ավիաչվերթները կիրականացվեն ամեն երկուշաբթի և ուրբաթ. թռիչքները Երևանից տեղի կունենան ժամը 08։00-ին, Կապանից՝ ժամը 10։00-ին։ Տոմսերի արժեքը՝ սկսած 20 հազար դրամից։ Ցանկացողները կարող են տոմսերի համար դիմել «Ատլանտիս» ընկերությանը։  Ավիաչվերթերը իրականացնում է «ՆովԷյր» ավիաընկերությունը։