Մենք ամբողջ աշխարհին ցույց ենք տվել, որ միասնական ենք Թուրքիայի հետ թե՛ խոսքով, թե՛ գործով. Ալիև

Անցյալ տարվա հունիսին Թուրքիայի նախագահ Ռեջեփ Թայիփ Էրդողանի հետ ստորագրված (այսպես կոչված) «Շուշայի հռչակագիրը» մեր եղբայրության և համագործակցության վառ օրինակ է։ Այս փաստաթղթով մենք պաշտոնականացրել ենք մեր համագործակցությունը բոլոր ձեւաչափերով։ Այս մասին հայտարարել է Ադրբեջանի նախագահ Իլհամ Ալիեւը՝ ելույթ ունենալով «Զարգացում եւ համագործակցություն» թեմայով միջազգային համաժողովում։

Նա ընդգծել է, որ Ադրբեջանն ու Թուրքիան դաշնակիցներ են բոլոր ոլորտներում, այդ թվում՝ ռազմական և պաշտպանական։

«Ստորագրելով Շուշայի հռչակագիրը՝ մենք ամբողջ աշխարհին հայտարարեցինք, որ թե՛ խոսքով, թե՛ գործով միասնական ենք Թուրքիայի հետ»,- ասել է Ալիևը։