Կրեմլը բարձր է գնահատել Էրդողանի հրավերը Պուտինին և Զելենսկիին՝ այցելելու Թուրքիա

Կրեմլը դրական է գնահատում Ուկրաինայում իրավիճակի կարգավորմանն ուղղված՝ ցանկացած երկրի նախաձեռնությունները. ասել է ՌԴ նախագահի մամուլի քարտուղար Դմիտրի Պեսկովը։ Այսպես է նա պատասխանել լրագրողների խնդրանքին՝ մեկնաբանել Թուրքիայի նախագահ Էրդողանի առաջարկը՝ Ռուսաստանի և Ուկրաինայի առաջնորդներ Վլադիմիր Պուտինի և Վլադիմիր Զելենսկու միջև Թուրքիայում բանակցություններ վարելու վերաբերյալ. գրում է «ՌԻԱ Նովոստի»-ն։

Պեսկովը հիշեցրել է, որ Մոսկվայի և Կիևի միջև հիմնական տարաձայնությունները վերաբերում են ուկրաինական կողմի՝ մինսկյան պայմանավորվածությունների չկատարմանը։

«Եթե մեր թուրք գործընկերները կարողանան ազդել ուկրաինացիների վրա և խրախուսել նրանց՝ կատարել նախկինում ձեռք բերված պայմանավորվածությունները, ապա դա կարելի է միայն ողջունել»,- ընդգծել է նա։