Իրանը կվերաբացնի ԻՀԿ գրասենյակը Սաուդյան Արաբիայում

Իրանցի երեք դիվանագետներ ժամանել են Ջիդդա՝ Իսլամական համագործակցության կազմակերպությունում Իրանի ներկայացուցչությունը վերաբացելու համար։ 2021 թվականի ապրիլից Թեհրանը և Էր Ռիադը ուղիղ բանակցությունների չորս փուլ են անցկացրել Բաղդադում, որոնց օժանդակել է Իրաքը, և ինչպես նշվում է, առաջընթաց է գրանցվել:

2016 թվականին Իրանի և Սաուդյան Արաբիայի հարաբերությունները կտրուկ սրվեցին այն բանից հետո, երբ սաուդյան իշխանությունները մահապատժի ենթարկեցին նշանավոր շիա հոգևորական Շեյխ Նիմր Բաքր ալ Նիմրին և 46 այլ դատապարտյալների, հիմնականում՝ սուննիների: Նրանց բոլորին մեղադրանք էր առաջադրվել ահաբեկչության համար:

Իրանի իշխանությունները խստորեն քննադատել են Էր Ռիադի գործողությունները, միաժամանակ հարձակում է իրականացվել Թեհրանում Սաուդյան Արաբիայի դեսպանատան և Մաշհադում հյուպատոսության վրա։ Դրանից անմիջապես հետո Սաուդյան Արաբիան հայտարարեց Իրանի հետ դիվանագիտական հարաբերությունները խզելու մասին։