Ուկրաինան Թուրքիային անօդաչու սարքերի շարժիչներ կմատակարարի

Ուկրաինական «Իվչենկո-պրոգրես» պետական ձեռնարկությունը և թուրքական Baykar Makina ընկերությունը համաձայնագիր են ստորագրել թուրքական անօդաչու թռչող սարքերի համար շարժիչներ մատակարարելու մասին։ Պայմանագիրը ստորագրվել է Ստամբուլի SAHA Expo ցուցահանդեսում. հայտնում է Ukrinform-ը։

Ըստ Baykar Makina-ի տեխնիկական տնօրեն Հալուք Բայրաքթարի՝ երկար տարիներ է, ինչ ընկերությունների միջև արդյունավետ համագործակցություն է հաստատվել։ Այսպես՝ թուրքական Akıncı անօդաչու թռչող սարքերում արդեն տեղադրում են ուկրաինական շարժիչներ, սկսվել է դրանց սերիական արտադրությունը։ Ստորագրված համաձայնագիրը կնշանակի անօդաչու մարտական ինքնաթիռների արտադրության սկիզբ։