Հակապատվաստման քարոզ անելու համար բժիշկը հեռացվել է աշխատանքից. Անահիտ Ավանեսյան

Երբ լիցենզավորման ինստիտուտը սկսի գործել, հակապատվաստումային գործունեություն իրականացնող բժիշկները կզրկվեն լիցենզիայից: Այս մասին լրագրողների հետ զրույցում ասաց առողջապահության նախարար Անահիտ Ավանեսյանը:

«Այն փոքրաթիվ բժիշկները, որոնք հակապատվաստումային քարոզ են տանում, շատ ակտիվ են, նրանք օր ու գիշեր զբաղված են այս վնասարարությամբ: Մոնիթորինգ, իհարկե, իրականացնում ենք, հնարավորինս փորձում ենք այն բժշկական կենտրոնների, առաջնային օղակի հետ աշխատանք տանել եւ հասկանալ՝ արդյո՞ք բժիշկը իրավունք ունի զբաղեցնելու մի պաշտոն, որին լրիվ հակառակ ուղղությամբ է իր հանրային խոսքը կառուցում», - ասաց նա: