2022 թվականից Լեհաստանը կհրաժարվի ռուսական գազից

Վարշավան չի երկարաձգի «Գազպրոմ»-ի հետ ռուսական կապույտ վառելիքի մատակարարման պայմանագիրը. հայտարարել է Լեհաստանի կառավարության Էներգետիկ ռազմավարական ենթակառուցվածների հարցերով ներկայացուցիչ Պետր Նաիմսկին։

Վարշավան հույս ունի հաջորդ տարվա հոկտեմբերի 1-ից Բալթյան խողովակով գազի մատակարարումները սկսել, և լեհ պաշտոնյան կարծում է, որ դա հնարավորություն կտա անհրաժեշտ քանակությամբ գազ մատակարարելու լեհական տնտեսությանը՝ առանց ռուսական աղբյուրների մասնակցության:

«Մենք չենք երկարաձգի պայմանագիրը ռուսական «Գազպրոմի» հետ»,- Նաիմսկու խոսքը մեջբերում է «ՌԻԱ Նովոստին»:

Այժմ Լեհաստանը Ռուսաստանից գնում է տարեկան մինչև 10 միլիարդ խորանարդ մետր գազ, վառելիքի մատակարարման պայմանագիրն ավարտվում է 2022 թվականին, և Վարշավան բազմիցս հայտարարել է, որ այն չի երկարացնի: