Կանադայի վարչապետը քարկոծվել է նախընտրական հանրահավաքի ժամանակ

Անհայտ անձինք փոքր քարեր են նետել Կանադայի վարչապետ Ջասթին Թրյուդոյի ուղղությամբ: Միջադեպը տեղի է ունեցել Լոնդոն քաղաքում (Օնտարիո նահանգ) նախընտրական միջոցառման ավարտին:

Կանադական CBC հեռարձակող հեռուստաալիքի հաղորդմամբ՝ Լիբերալ կուսակցության կողմնակիցների հետ Թրյուդոյի հանդիպմանը եկել է նաև քաղաքացիների մի մեծ խումբ, որը համաձայն չէ նրա քաղաքականության հետ:

Սոցիալական ցանցերում տեղադրված տեսանյութը ցույց է տալիս, թե ինչպես է ավազաքարերի մի բուռ թռչում ավտոբուս նստող վարչապետի ուղղությամբ: Բացի դրանից՝ ցուցարարները կարգախոսներ են բացականչել քաղաքական գործչի հետևից: Քարերի մի մասը հասել է Թրյուդոյին, մի մասը՝ նրա անվտանգության աշխատակիցներին:

Ավելի վաղ բողոքի ակցիաների պատճառով վարչապետը ստիպված էր չեղյալ հայտարարել Օնտարիո նահանգի Բոլթոն քաղաքում անցկացվելիք միջոցառումը:

Կանադան նախատեսում է արտահերթ խորհրդարանական ընտրություններ անցկացնել սեպտեմբերի 20-ին: