Աֆղանստանից հեռանալուց առաջ ԱՄՆ-ը շարքից հանել է զենքերն ու սարքավորումները

Աֆղանստանում մնացած ամերիկյան ամբողջ ռազմական տեխնիկան նախապես հանվել է շարքից. լրագրողների հետ ճեպազրույցում ասել է ԱՄՆ կենտրոնական հրամանատարության պետ Քենեթ Մաքքենզին:

«Մենք նախընտրեցինք (օդանավակայանի հակահրթիռային պաշտպանության) համակարգերն աշխատեցնել մինչև վերջին րոպեն, դրանք բարդ համակարգեր են, որոնք ժամանակատար են և տեխնիկապես դժվար է քանդել, ուստի դրանք շարքից հանեցինք, որպեսզի այլևս երբեք չկիրառվեն։ Մենք ավելի կարևոր համարեցինք էվակուացնել մեր բանակը, այլ ոչ թե համակարգերը»,- ասել է Մաքքենզին, որի խոսքերը մեջբերում է РИА Новости-ն:

Նա նաև նշել է, որ 26 ռազմական մեքենա և 73 ինքնաթիռ է միտումնավոր շարքից հանվել. «Դրանք այլևս երբեք չեն թռչի»: