Ալիևին քննադատած ադրբեջանցի ընդդիմադիր բլոգերը մահացած է հայտնաբերվել Վրաստանում

Վրաստանում սպանվել է ադրբեջանցի ընդդիմադիր բլոգեր Հուսեյն Բակիխանովը: Ռուս-իսրայելցի բլոգեր Ալեքսանդր Լապշինը, վկայակոչելով իր աղբյուրները, հայտնում է, որ Բակիխանովին հրել են իր բնակարանի պատուհանից, որը նա վարձել էր Թբիլիսիում:

Լապշինն ասել է, որ ավելի վաղ ադրբեջանցի ընդդիմադիրը հետապնդումների էր ենթարկվել Ադրբեջանում: Նա ձերբակալվել էր Բաքվում, որտեղ նրան դաժան ծեծի էին ենթարկել ոստիկանները՝ պահանջելով հրապարակայնորեն ներողություն խնդրել բռնապետ Իլհամ Ալիևից՝ նախկինում նրա հասցեին հնչեցրած քննադատության համար:

Փախչելով հետապնդումներից՝ Բակիխանովը հասել էր  հարևան Վրաստան: Թբիլիսիում բլոգերը հարձակման էր ենթարկվել մի քանի հոգու կողմից, ինչպես նաև դաժան ծեծի ենթարկվել: Նա հոսպիտալացվել էր: Սակայն Ալիևը որոշել է ընդմիշտ փակել իշխանություններին քննադատողի բերանը․ Բակիխանովին մահացած են գտել իր բնակարանի պատուհանների տակ: