Բայդենի` ազգային անվտանգության հարցերով խորհրդականը շփվել է Հայաստանի եւ Ադրբեջանի առաջնորդների հետ

ԱՄՆ նախագահ Բայդենի` ազգային անվտանգության հարցերով խորհրդական Ջեյք Սալիվանն առանձին հեռախոսազրույցներ է ունեցել Հայաստանի եւ Ադրբեջանի առաջնորդների հետ: Այս մասին ասվում է Սպիտակ տան հաղորդագրության մեջ:

Ջեյք Սալիվանը «փոխանցել է Միացյալ Նահանգների հանձնառությունը խաղաղությանը, անվտանգությանը եւ բարգավաճմանը Հարավային Կովկասում»: «Նա մտահոգություն է հայտնել Հայաստանի եւ Ադրբեջանի միջեւ հարաբերություններում վերջին լարվածության կապակցությամբ եւ շեշտել է, որ չգծանշված սահմանի մոտ զինվորականների տեղաշարժն անպատասխանատու եւ սադրիչ է»,- ասվում է Սպիտակ տան հայտարարության մեջ։

ԱՄՆ նախագահի` ազգային անվտանգության հարցերով խորհրդականը ողջունել է երկու կողմերի միջեւ ընթացող բանակցությունը եւ երկու առաջնորդների՝  խնդրի խաղաղ կարգավորման հանձնառությունը: Սալիվանն «ընդգծել է, որ երկու երկրները պետք է պաշտոնական բանակցություններ վարեն իրենց միջազգային սահմանի գծանշման շուրջ»։

Սալիվանը շեշտել է «ԱՄՆ-ի՝  որպես ԵԱՀԿ Մինսկի խմբի համանախագահի՝ Հարավային Կովկասում խաղաղության, անվտանգության եւ բարգավաճման հասնելու հանձնառությունը», ինչպես նաեւ տարածաշրջանային հաշտեցման հասնելը երկկողմ շփումների միջոցով: