Անկարան Իսրայելին կոչ է անում անհապաղ դադարեցնել բռնությունները Երուսաղեմում

Թուրքիան կոչ է անում անհապաղ դադարեցնել Իսրայելի օկուպացիոն ուժերի բռնությունները Երուսաղեմում՝ խաղաղ ու անզեն պաղեստինյան բնակչության նկատմամբ: Այս մասին Twitter-ում գրել է Թուրքիայի նախագահի մամուլի քարտուղար Իբրահիմ Քալընը:

Քալընը նշել է, որ Թուրքիայի նախագահ Ռեջեփ Թայիփ Էրդողանի հանձնարարականով՝ պաշտոնական Անկարան բոլոր մակարդակներում կիրառել է լծակներ, որ դադարեցնի Իսրայելի բռնությունները գրավյալ Արևելյան Երուսաղեմում:

«Պաղեստինցիների հետ կապված ցանկացած բռնության և միջադեպի պատասխանատվությունն ամբողջապես կրում են Իսրայելի իշխանությունները»,- գրել է Թուրքիայի առաջնորդի խոսնակը:

Նշենք, որ Իսրայելի գործողությունները դատապարտել էր նաև երկրի նախագահ Ռեջեփ Թայիփ Էրդողանը։

Հիշեցնենք, որ Երուսաղեմում գտնվող՝ մուսուլմանների համար կարևորագույն սրբատեղիում՝ Ալ Աքսա  մզկիթում, պաղեստինցիների աղոթքի ժամանակ իսրայելական ոստիկանությունը հարձակվել և փորձել էր ցրել նրանց, բախումների ընթացքում հարյուրավոր մարդիկ են վիրավորվել։