ԱՄՆ-ն այս շաբաթ պատժամիջոցներ կկիրառի Նավալնիի հետապնդումների պատճառով. CNN

Սպիտակ տունը պատրաստվում է այս շաբաթ Ռուսաստանի դեմ պատժամիջոցներ կիրառել ռուս ընդդիմադիր Ալեքսեյ Նավալնիի թունավորման և բանտարկության համար: Այս մասին հայտնում է CNN-ը՝ վկայակոչելով ԱՄՆ նախագահ Ջո Բայդենի վարչակազմից երկու աղբյուր:

Պատժամիջոցների կիրառումը տեղի կունենա Եվրամիության հետ համաձայնեցմամբ: CNN-ի աղբյուրները չեն հստակեցնում, թե կոնկրետ ով է լինելու պատժամիջոցների ցուցակում: Նրանցից մեկն ասել է, որ դրանում կներառվեն ինչպես ֆիզիկական, այնպես էլ իրավաբանական անձինք:

Ըստ աղբյուրների՝ այս պատժամիջոցներով Բայդենի վարչակազմը ցանկանում է «ամուր հաղորդագրություն» ուղարկել մարդու իրավունքների և դաշնակիցների համատեղ գործողությունների կարևորության մասին, և վարչակազմը նախատեսում է զբաղվել Ռուսաստանի կողմից առաջիկա շաբաթներին նետված մարտահրավերների ավելի լայն շրջանակով: