Իրանի դեսպանը Թեհրանի սկանդալային հայտարարությունից հետո կանչվել է Թուրքիայի ԱԳՆ

Թուրքիայում Իրանի դեսպան Մոհամադ Ֆերազմենդը կանչվել է Թուրքիայի արտգործնախարարություն: Նրա հետ զրույց է տեղի ունեցել՝ կապված Թեհրանի՝ Անկարայի կողմից Իրաքի ինքնիշխանությունը խախտելու մասին հայտարարության հետ:

Ավելի վաղ Իրաքում Իրանի դեսպան Իրաջ Մասջեդին Թուրքիային կոչ էր արել հետ կանչել իր զորքերը Իրաքի տարածքից և չխախտել այդ պետության ինքնիշխանությունը: Նա շեշտել էր, որ Իրանը դեմ է Իրաքի գործերին Թուրքիայի միջամտությանը:

Թուրքիայի արտգործնախարարությունը անհամաձայնություն է հայտնել Բաղդադում Իրանի դեսպանի առաջադրած մեղադրանքներին՝ շեշտելով, որ Անկարան պայքարում է ահաբեկիչների դեմ՝ հանուն Իրաքի կայունության, անվտանգության և ինքնիշխանության. հաղորդում է Anadolu գործակալությունը:

Ըստ գործակալության՝ Թուրքիայի արտգործնախարարության ներկայացուցիչները Ֆերազմենդի հետ զրույցում նշել են, որ ակնկալում են Իրանի աջակցությունը․ Թեհրանը չպետք է դեմ լինի Իրաքի տարածքում Թուրքիայի կողմից ահաբեկչության դեմ պայքարին: