Իրանը ողջունել է Արցախյան խնդրում Ռուսաստանի գործադրած ջանքերը

Իրանը ողջունում է Ռուսաստանի ջանքերը Լեռնային Ղարաբաղի հակամարտության խաղաղ կարգավորման ուղղությամբ, բայց տարածաշրջանում սպառնալիքները դեռ չեն վերացել: Այս մասին երեքշաբթի ասել է Իրանի Մեջլիսի նախագահ Մոհամադ Բաղեր Ղալիբաֆը՝ ելույթ ունենալով ՌԴ ԱԳՆ դիվանագիտական ակադեմիայում:

«Այս հակամարտության շարունակությունը կարող է անվտանգության խնդիրներ առաջացնել Իրանի հյուսիսային սահմաններին: Մենք ուրախ ենք, որ Ռուսաստանը ջանքեր է գործադրել պատերազմը հնարավորինս շուտ դադարեցնելու ուղղությամբ: Բայց ինձ թվում է, որ այս տարածաշրջանում նիրհած սպառնալիքներ կան: Ես նկատի ունեմ, որ անհրաժեշտ է տարածաշրջանում ահաբեկչական ուժերի ներկայությունը կանխել»,- ասել է նա:

Ըստ Ղալիբաֆի՝ ներկայումս օրակարգում է տարածաշրջանի երկրների միջև կայուն համագործակցության կազմակերպման անհրաժեշտությունը, և դա նաև նոր հնարավորություններ կբացի իրանա-ռուսական հարաբերությունների զարգացման համար: