Վրաստանի բնակիչները նախազգուշացվել են էլեկտրաէներգիայի գների «անխուսափելի» թանկացման մասին

Վրաստանի բնակչության համար էլեկտրաէներգիայի գների բարձրացումն անխուսափելի է: Այս հայտարարությունը դեկտեմբերի 28-ին հրապարակել է Energo-Pro Georgia-ի մամուլի ծառայությունն իր ֆեյսբուքյան էջում:

Մամուլի ծառայությունը հիշեցրել է, որ գործող սակագինն ուժի մեջ է 2018 թվականի հունվարի 1-ից և ընդունվել է երեք տարի ժամկետով: Ընկերությունն ընդգծել է, որ էլեկտրաէներգիայի սահմանված արժեքը չի ծածկում դրա գինը:

«Էլեկտրաէներգիայի սակագնի զգալի բարձրացումն անխուսափելի է,- ասվում է էներգաբաշխիչ ընկերության հայտարարության մեջ:- Մենք տեղյակ ենք խնդրի զգայունության մասին, բայց, մյուս կողմից, եթե էլեկտրաէներգիայի գնման և ներդրումների ծախսերը ամբողջությամբ չֆինանսավորվեն, ընկերությունը պարզապես չի կարող շարունակել իր գործունեությունը, էլեկտրամատակարարման հարցը վտանգված կլինի, ինչն առաջին հերթին վնաս կհասցնի հաճախորդի շահերին»:

Նշենք, որ Վրաստանում էլեկտրաէներգիայի արժեքը բնակչության համար 18,89 թեթրի է (մոտ 30 դրամ) 1 կՎտ-ի դիմաց: