ՌԴ ՕԴՈւ-ի Իլ-76 ինքնաթիռները սակրավորների են տեղափոխում ԼՂ

Ռուսաստանի Դաշնության պաշտպանության նախարարությունը հայտնել է Ռուսաստանի Դաշնության օդատիեզերական ուժերի ռազմատրանսպորտային ավիացիայի կողմից Ուլյանովսկ-Վոստոչնի օդանավակայանից Իլ -76 ինքնաթիռներով Կենտրոնական ռազմական օկրուգի խաղաղապահ բրիգադի ինժեներական ստորաբաժանման զինվորականների, հատուկ տեխնիկայի, ինչպես նաև սարքավորումների տեղափոխման մասին Լեռնային Ղարաբաղ: Այս մասին ասվում է երեքշաբթի գերատեսչության տարածած հաղորդագրության մեջ:

«Սակրավորները կկատարեն ինժեներական հետախուզության, տեղանքի, ճանապարհների ու օբյեկտների ականազերծման աշխատանքներ, ինչպես նաև կապահովեն մատակարարման եւ տարհանման ուղիների նախապատրաստում ու պահպանում, ջրի մաքրում եւ ինժեներական ապահովման այլ առաջադրանքների կատարում»,- նշվում է հաղորդագրության մեջ ու հավելվում, որ պայթուցիկ օբյեկտների հայտնաբերման ու որոնման համար ծառայողական շներ կկիրառվեն: