Ալիևը դասալիք-փախստականներին բնակեցնում է Թալիշի գյուղերում` որպես էթնոցիդի քաղաքականության մաս. թալիշ պատմաբան

Թալիշի պատմաբան Սաբարզ Մերդը ֆեյսբուքյան իր էջում հայտնել է, որ իշխանությունները Լենքորանի շրջանի Ռվո և Կուրոնբա գյուղերը բնակեցնում են Ֆիզուլիի և Աղդամի շրջաններից նոր փախստականներով: Սակայն բնակիչների սուր դժգոհության արդյունքում նրանց վտարել են գյուղերից:

«Ալիևների կլանի գործողությունները թալիշ ժողովրդի նկատմամբ էթնոցիդի քաղաքականության շարունակությունն են, Թալիշստանի էթնիկ դիմագիծը բռնի փոխելու փորձ»,- գրում է պատմաբանը:

Նա նշում է, որ հարցի մյուս կողմն այն է, որ Թալիշի բնակավայրերում բնակչության խտությունը շատ մեծ է:

«Այն փաստը, որ Ալիևի կառավարությունը մի խումբ փախստականներ է տեղափոխում ոչ թե Ադրբեջանի սակավաթիվ բնակավայրեր, այլ թալիշախոս բնակչության խիտ բնակեցված տարածքներ, թալիշների էթնոցիդային քաղաքականության շարունակությունն է», - նշում է Մերդը:

Ըստ նրա՝ թալիշների նկատմամբ Ալիևի թշնամական քաղաքականության մեկ այլ դրսևորումն այն է, որ  թալիշ երիտասարդ տղամարդկանց ուղարկում է ռազմաճակատ, սպանում նրանց, իսկ դրա դիմաց առաջնագծի տարածքներից բերում առողջ և դասալիք փախստականների: