«Հակամարտությունների խաղաղ կարգավորումն այլընտրանք չունի». Մնացականյանն ընդունել է Վրաստանի պաշտպանության նախարարին

Փետրվարի 28-ին ԱԳ նախարար Զոհրաբ Մնացականյանը հանդիպեց Վրաստանի պաշտպանության նախարար Իրակլի Ղարիբաշվիլիի գլխավորած պատվիրակությանը:

ԱԳՆ-ից Yerkir.am-ին հայտնում են, որ կողմերը գոհունակությամբ ընդգծեցին պատմական բարեկամության եւ բարիդրացիական հարաբերությունների բարձր մակարդակը՝ վերահաստատելով երկկողմ պատրատասկամությունը՝ քայլեր ձեռնարկելու հայ-վրացական համապարփակ օրակարգի ընդլայնման և հարստացման ուղղությամբ:

ԱԳ նախարարը գոհունակությամբ արձանագրեց, որ Հայաստանի եւ Վրաստանի միջեւ տարբեր մակարդակներում առկա է երկխոսության եւ համագործակցության հագեցած օրակարգ, որը պայմանավորված է նաեւ երկու երկրների ռազմավարական փոխկապակցվածությամբ:

Անդրադարձ կատարվեց տարածաշրջանային մի շարք հարցերի: Նախարար Մնացականյանը վրացական կողմին ներկայացրեց Լեռնային Ղարաբաղի խաղաղ կարգավորման գործընթացում Հայաստանի սկզբունքային դիրքորոշումը եւ մոտեցումները: Երկուստեք ընդգծվեց, որ հակամարտությունների խաղաղ կարգավորումն այլընտրանք չունի: