Դատախազությունն ուսումնասիրում է Երևանի քաղաքապետարանին «ԿամԱԶ» մակնիշի ավտոմեքենաների նվիրատվության վերաբերյալ հրապարակումները.«Փաստինֆո»

ՀՀ գլխավոր դատախազությունն ուսումնասիրում է Երևանի քաղաքապետարանին «ԿամԱԶ» մակնիշի ավտոմեքենաների նվիրատվության վերաբերյալ հրապարակումները։ Այս մասին «Փաստինֆո»-ին հայտնեց ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը։

«Մոնիթորինգի միջոցով ֆիքսել ենք հրապարակումները և դրանց հիման վրա Դատախազությունում նախաձեռնվել է ուսումնասիրություն»,- ասաց Գոռ Աբրահամյանը՝ հավելելով, որ ուսումնասիրության ընթացքի մասին Դատախազությունը կտեղեկացնի։ 

Հիշեցնենք, որ Երեւանի քաղաքապետ Հայկ Մարությանը նոյեմբերի 26-ին հերքել էր նախորդ իշխանությունների օրոք օլիգարխ համարվող, իսկ ներկա իշխանությունների բնորորշմամբ գործարար Սամվել Ալեքսանյանի կողմից ԿամԱԶ նվիրատվությունը, սակայն նոյեմբերի 28-ին պաշտոնապես հաստատվեց, որ«Ալեքս ընդ Հոլդինգ» ընկերությունը Երևանի քաղաքապետարանին է նվիրել «ԿամԱԶ» մակնիշի 3 աղբատար մեքենա։