Արցախի միջազգային ճանաչումը կնպաստի հանրապետության անվտանգության ամրապնդմանը․ Մայիլյան

Արցախի ԱԳ նախարար Մասիս Մայիլյանն Ավստրալիայում հանդիպել է  խորհրդարանի Ներկայացուցիչների պալատի տնտեսական հարցերով մշտական հանձնաժողովի նախագահ Թիմ Ուիլսոնի, նաեւ Ներկայացուցիչների պալատի արտաքին հարաբերությունների եւ պաշտպանության հարցերով մշտական հանձնաժողովի անդամ Ռեքս Պատրիկի հետ:

Նախարարը ներկայացրել է Արցախի իշխանությունների արտաքին քաղաքականությունը ու այդ համատեքստում նշել, որ Արցախի միջազգային ճանաչումը կնպաստի հանրապետության անվտանգության ամրապնդմանն ու տարածաշրջանային կայունության ապահովմանը:

Մայիլյանը խոսել է Արցախում ներդրումներ կատարելու անհրաժեշտության մասին եւ կարեւորել Ավստրալիայում Արցախի մասին իրազեկվածության բարձրացումն ու երկու երկրի միջեւ տարբեր մակարդակներով գործակցության հաստատումը:

Հանդիպմանը մասնակցել են նաեւ Արցախի Ազգային Ժողովի պատգամավոր Դավիթ Իշխանյանը,Ավստրալիայում Արցախի մշտական ներկայացուցիչ Քայլար Միքայելյանը եւ Հայ Դատի Ավստրալիայի հանձնախմբի գործադիր տնօրեն Հայկ Կայսերյանը: Ավելի վաղ Մայիլյանը հանդիպել էր նաեւ Սենատի արտաքին հարաբերությունների հանձնաժողովի նախագահի հետ, իսկ պատվիրակության պատվին դաշնային խորհրդարանում ընդունելություն էր կազմակերպվել: