Շարունակվել է Մանվել Գրիգորյանի և Նազիկ Ամիրյանի գործով դատական նիստը. այն ընդմիջվել է մինչև 14.30-ը

ՀՀ ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով` Երևանի ընդհանուր իրավասության դատարանում այսօր շարունակվել է դատական նիստը, որը մոտ մեկ ժամից ընդմիջվել է մինչև ժամը 14:30-ը:

Դատական նիստը նախագահում է դատավոր Մնացական Մարտիրոսյանը:

Մանվել Գրիգորյանը դատական նիստին ներկա չի եղել  առողջական վիճակի պատճառով: Նիստին, սակայն, ներկա է եղել  բժիշկ-էնդոկրինոլոգ Լուսինե Մամիկոնյանը, որին պաշտպանական կողմի խնդրանքով ներգրավել են դատաբժշկական միջգերատեսչական փորձաքննություն կատարող հանձնաժողովի կազմում: Փորձաքննություն իրականացնելու միջնորդություն ներկայացրել էր դատախազությունը, և այսօրվա դատական նիստում դատախազ Վահե Դոլմազյանը հայտարարել է, որ բժիշկ-էնդոկրինոլոգը դատարանին պետք է ներկայացնի իր աշխատանքային փորձի վերաբերյալ համապատասխան փաստաթղթերը: