Վենեսուելայի իշխանությունները կանխել են հեղաշրջման փորձ

Վենեսուելայի իշխանությունները հայտարարել են երկրում զինվորական հեղաշրջման փորձի կանխման մասին. տեղեկացնում է France-Presse գործակալությունը:

Երկրի կապի եւ տեղեկատվության նախարար Խորխե Ռոդրիգեսը հայտնել է, որ հունիսի 23-24-ին ընդդիմությունը մտադիր է եղել պետական հեղաշրջում կազմակերպել, սպանել նախագահ Մադուրոյին, նրա կնոջը, ինչպես նաեւ Ազգային սահմանադրական ժողովի ղեկավար  Կաբելեոյին ու զավթել իշխանությունը:

 Ըստ նրա՝  խռովարարները ցանկացել են իշխանության բերել գեներալ Ռաուլ Բադուելին, որն ընդդիմության կողմն է անցել եւ այժմ բանտում է:

Նախարարն ընդդիմության առաջնորդ, Վենեսուելայի ԱԺ նախագահ Խուան Գուայդոյին, որն իրեն երկրի նախագահի ժամանակավոր պաշտոնակատար է հռչակել, մեղադրել է երկրում «արյան ծով» ստեղծելու մտադրության մեջ:

Ռոդրիգեսը նշել է, որ ԱՄՆ-ը, Կոլումբիան եւ Չիլին անմիջականորեն աջակցել են խռովարարներին:

Ավելի ուշ Խուան Գուայդոն հերքել է հեղաշրջման փորձին իր մասնակցությունը: «Արդեն որերորդ անգամ է, լրատվամիջոցներն արդեն կորցրել են հաշիվը, թե քանի անգամ է իմ հասցեին նույն մեղադրանքը հնչեցվել»,- ասել է նա: