Ցիպրասը Թուրքիայի նկատմամբ պատժամիջոցներ կիրառելու համար կդիմի ԵՄ

Հունաստանի վարչապետի պաշտոնակատար Ալեքսիս Ցիպրասը, որն օրեր առաջ հրաժարական էր տվել` արտահերթ խորհրդարանական ընտրություններ նշանակելու համար, կառավարությունում ԱԳՆ, ՊՆ ղեկավարների և ԳՇ պետի մասնակցությամբ նիստում հայտարարել է, որ Թուրքիայի` Կիպրոսի հատուկ տնտեսական գոտում հորատման աշխատանքներ իրականացնելու պատճառով պատրաստվում է դիմել ԵՄ` Թուրքիայի նկատմամբ պատժամիջոցներ կիրառելու համար. հաղորդում է ensonhaber.com կայքը:

«ԵՄ գագաթնաժողովից առաջ Կիպրոսի նախագահի հետ համակարծիք ենք: Այսպես` եթե Թուրքիան շարունակի իր գործողությունները Կիպրոսի հատուկ տնտեսական գոտում, Թուրքիայի դեմ, ներառյալ պատժամիջոցների վերաբերյալ, թող որոշումներ կայացնեն: Հունաստանի և հունական բնակչության ինքնիշխանության իրավունքների ոտնահարումն իր հետևանքները կունենան»,- նշել է Ցիպրասը: