Ֆրանսիայի ԱԳՆ-ն Թուրքիայի կողմից С-400 ձեռք բերելը համարում է ինքնիշխան ընտրություն

Թուրքիայի կողմից Ռուսաստանից С-400 զենիթահրթիռային համակարգեր ձեռքբերելը ինքնիշխան ընտրություն է, սակայն պետք է հիշել, որ ՆԱՏՕ-ն ամբողջական միավոր է, հայտարարել է Ֆրանսիայի ԱԳՆ-ն: Այս մասին հաղորդում է РИА Новости-ն:

«Դա Թուրքիայի ինքնիշխան որոշումն է, սակայն ՆԱՏՕ-ի ամբողջականությունը ևս պակաս կարևոր չէ, և դրան նպաստում է ՆԱՏՕ-ի դաշնակիցների ռազմական հնարավորությունների համապատասխանությունը»,- ասվում է Ֆրանսիայի ԱԳՆ հայտարարության մեջ:

Այսօր առավոտյան Թուրքիայի ԱԳՆ ղեկավար Մեվլութ Չավուշօղլուն հայտարարել է, որ Թուրքիան մտադիր չէ հրաժարվել  ռուսական զենիթահրթիռային համակարգերի գնման պրոցեսից, և դրա համար պատրաստ է ցանկացած գին վճարել: