Ռոհանին ողջունել է Իրանի հարցով Քաթարի դիրքորոշումը

Թեհրանն այլ երկրների հետ հակամարտության չի ձգտում, սակայն վճռական պատասխան կտա անհրաժեշտության դեպքում: Այդ մասին ասել է Իրանի նախագահ Հասան Ռոհանին Քաթարի էմիր Թամիմ բեն Համադ ալ Թանի հետ հեռախոսազրույցում. հայտնում է РИА Новости-ն:

Կողմերը քննարկել են Մերձավոր Արևելքի խնդիրները. Ռոհանին նշել է, որ դրանք չի կարելի  լուծել ռազմական ճանպարհով:

Իրանի նախագահը նաև ողջունել է Քաթարի դիրքորոշումը  Իսլամական համագործակցության կազմակերպության գագաթնաժողովում և Արաբական պետությունների լիգայի հանդիպման ժամանակ` նշելով, որ Դոհայի մոտեցումը նպաստում  է լարվածության թուլացմանը:

Հիշեցնենք, որ անցյալ ուրբաթ Մեքքայում տեղի էին ունեցել Արաբական պետությունների լիգայի և Պարսից ծոցի արաբական պետությունների համագործակցության խորհրդի առաջնորդների արտահերթ հանդիպումները, որոնց մասնակիցները դատապարտել էին տարածաշրջանում Իրանի «ագրեսիվ գործողությունները» և երկրի  միջամտությունը արաբների ներքին գործերին:

«Քաթարն առարկություններ ունի ԱՊԼ և ՊԾԱՊՀԽ գագաթնաժողովների արդյունքներով ընդունված հայտարարությունների կապակցությամբ, որովհետեւ դրանց որոշ կետեր հակասում են Դոհայի արտաքին քաղաքականությանը»,- Al Araby -ին ասել է Քաթարի ԱԳ նախարարը: