Թուրքիան քննադատել է Պորտուգալիայի որոշումը

Թուրքիայի ԱԳՆ-ն հայտարարություն է տարածել, որում քննադատում է երեկ Պորտուգալիայի խորհրդարանի կողմից ընդունված, Հայոց ցեղասպանությունը ճանաչող բանաձևը. – հաղորդում է «Անադոլու» գործակալությունը։

Հայտարարության մեջ մասնավորապես նշվում է. «Մենք քննադատում ենք Պորտուգալիայի խորհրդարանի կողմից 1915 թ. դեպքերի վերաբերյալ 2019 թ. ապրիլի 26-ին կայացրած որոշումը։ Պատմությունը սևացնող, միջազգային իրավունքն ու Եվրոպական իրավունքը չհարգող նմանատիպ մոտեցումները երբեք չեն կարող ընդունվել»։

Հայտարարության մեջ նաև նշվում էր, որ Թուրքիան Պորտուգալիայից ակնկալում է ներքաղաքական շարժառիթներով իրականությունը խեղաթյուրելու փոխարեն հարգանք ցուցաբերի պատմական փաստերի, արխիվային ապացույցների հանդեպ։