Ուզում եմ հիշեցնել՝ տղամարդիկ նույնպես ունեն այլ պարտականություններ, բացի պետական ծառայությունից. Փաշինյանը՝ Բաթոյանին

Կառավարության այսօրվա նիստում ՀՀ աշխատանքի եւ սոցիալական հարցերի նախարար Զարուհի Բաթոյանը նշեց, որ Մարտի 8-ի առթիվ ցանկանում է իր համերաշխությունը հայտնել կառավարությունում և  տարբեր նախարարություններում աշխատող կանանց: «Ուզում եմ նշել, որ կանայք նաև այլ պարտականություններ ունեն, պետական ծառայությունից բացի: Իսկ տղամարդկանցից ակնկալում եմ աջակցություն կանանց համար ազատ, ապահով միջավայր ստեղծելու գործում՝ նկատի ունենալով, որ հավասար հնարավորությունները ենթադրում են նաև  պարտականությունների հավասար բաշխում»,- հավելեց նա՝ հիշեցնելով, որ Մարտի 8-ը կանանց իրավունքների, ցանկությունների և խնդիրների մասին բարձրաձայնելու օր է:

Վարչապետ Նիկոլ Փաշինյանը ծիծաղելով պատասխանեց. «Լիարժեք միանալով Ձեր ասածին` ուզում եմ հիշեցնել, որ տղամարդիկ նույնպես ունեն այլ պարտականություններ, բացի պետական ծառայությունից: Այնպես չէ, որ տղամարդկանց միակ պարտականությունը պետական համակարգում աշխատելն է»: