Կառավարությունը կգործարկի մսի և կենդանի գլխաքանակի արտահանման մեխանիզմներ. առկա է ամսական 50 հազար գլուխ գառ արտահանելու ներուժ

Կառավարության նիստում վարչապետ Նիկոլ Փաշինյանը հանձնարարեց մշակել և զարգացնել մսի ու կենդանի գլխաքանակի արտահանման մեխանիզմները։

Նա հիշեցրեց, որ անցյալ տարի հավաստիացում էին ստացել, որ Հայաստանն ունի մանր եղջերավոր  անասունների ու դրանց մսի արտահանման հսկայական պոտենցիալ: Ըստ վարչապետի` սա կարևոր թեմա է, և հարկավոր է քննարկել այս ուղղությունը վարկավորելու հնարավորությունը։ «Մենք պետք է քաջալերենք մեր գյուղացիներին՝ զարգացնելու համար ոչխարաբուծությունը»,- ասաց նա:

Վարչապետի խորհրդական Արամ Ղարիբյանը հայտնեց, որ ամսական 50 հազար գլուխ գառ արտահանելու պոտենցիալ կա երկրում: Նա տեղեկացրեց նաև, որ Հայաստանում առկա է 600-700 հազար գլուխ ոչխար, և գյուղացիական տնտեսությունները քայլեր են ձեռնարկում դրանց թիվն ավելացնելու ուղղությամբ:

Փաշինյանը նշեց, որ Կենտրոնական բանկի նախագահի հետ քննարկել են ոչխարաբուծության զարգացման վարկերի՝ ցածր տոկոսադրույքով տրամադրման հնարավորությունները և առաջիկայում դրանք կներկայացվեն: