Հայաստանում կգործի մանկական արյունաբանության և ուռուցքաբանության մեկ միասնական կլինիկա

Պրոֆեսոր Յոլյանի անվան արյունաբանական կենտրոնի և ԵՊԲՀ Մուրացան հիվանդանոցային համալիրի մանկական ուռուցքաբանական և արյունաբանական ծառայությունների միավորման արդյունքում Հանրապետությունում այսուհետ գործելու է մանկական արյունաբանության և ուռուցքաբանության մեկ միասնական կլինիկա։ Այն տեղակայված կլինի պրոֆեսոր Յոլյանի անվան արյունաբանական կենտրոնում:

Լրագրողների հետ զրույցում այս մասին ասաց Արյունաբանական կենտրոնի տնօրեն Սամվել Դանիելյանը: Նրա խոսքով՝ նման մտադրություն ժամանակին եղել է, սակայն ինչ-ինչ պատճառներով հետաձգվել է:

«Արյունաբանական կենտրոնի և ԵՊԲՀ Մուրացան հիվանդանոցային համալիրի մանկական ուռուցքաբանական և արյունաբանական ծառայությունների միավորումը հնարավորություն կտա կենտրոնացնել մեր միջազգային կապերն այս ոլորտում», -ասաց Դանիելյանը՝ հավելելով, որ այսօր քաղցկեղով և արյան հիվանդություններով 10 երեխաներից 7-ը կատարյալ բուժվելու հնարավորություն ունի: