Մեկ բան ակնհայտ է` նախարարությունների թիվը կկրճատվի. Փաշինյան

Այսօր` կառավարության նիստի օրակարգին անցնելուց առաջ, ՀՀ վարչապետի պաշտոնակատար Նիկոլ Փաշինյանն անդրադարձավ կառավարության կառուցվածքի փոփոխության հարցին:

Փաշինյանը նշեց, որ, օրենքի համաձայն, կառավարությունը ձևավորված է համարվում, երբ նշանակված է կառավարության անդամների 2/3-ը: 

«Մենք կգնանք այդ ճանապարհով. կառավարության անդամների 2/3-ը կնշանակվի, 1/3-ը չի նշանակվի, քանի դեռ մենք մինչև վերջին դետալը չենք քննարկել կառավարության կառուցվածքի փոփոխությունների հարցը: Մեկ բան ակնհայտ է` նախարարությունների թիվը կկրճատվի, ուղղակի այս պրոցեսը պետք է տանել մաքսիմալ անցնցում, սահուն և կանխատեսելի ճանապարհով»,- ասաց նա:  

Նշենք, որ կառավարության նիստի օրակարգում ընդգրկված է 20 հարց, որոնցից 12-ը՝ չզեկուցվող: