Արամ Ա-ն ընդունել է Լիբանանում ՀՀ նորանշանակ դեսպան Վահագն Աթաբեկյանին

Ն.Ս.Օ.Տ.Տ. Արամ Ա կաթողիկոսն Անթիլիասի մայրավանքում երեքշաբթի ընդունել է Լիբանանում ՀՀ նորանշանակ դեսպան Վահագն Աթաբեկյանին:

Կաթողիկոսի պաշտոնական կայքէջը տեղեկացնում է, որ  մոտ մեկ ժամ տևած հանդիպման նպատակը եղել է ծանոթանալը, որի ընթացքում Վեհափառը մի շարք հիմնական տեղեկություններ է հաղորդել դեսպանին, հատկապես` Լիբանանի ներքին քաղաքական կյանքի, Մեծի Տանն Կիլիկո կաթողիկոսության գործունեության, ինչպես նաև Հայաստան-Սփյուռք գործակցության մասին:

Նորին սրբությունը վստահեցրել է, որ կաթողիկոսարանը շարունակելու է իր բոլոր գաղութներում զորակցել դեսպանատան աշխատանքներին:

Նորանշանակ դեսպանն իր հերթին Վեհափառին տեղեկացրել է  դեսպանատան առաջիկա գործունեության մասին և շնորհակալություն հայտնել իրեն հաղորդված տեղեկությունների և իր անձի նկատմամբ ցուցաբերված վստահության ու զորակցության համար: