Թրամփը կարող է դադարեցնել Բաքվին օգնության տրամադրումն արգելող 907-րդ լրացման գործողությունը. Բոլթոն

ԱՄՆ նախագահ Դոնալդ Թրամփի ազգային անվտանգության հարցերով խորհրդական Ջոն Բոլթոնը  չի բացառել, որ ԱՄՆ նախագահը կարող է իր լիազորություններն օգտագործել Ազատության աջակցման ակտի 907-րդ լրացման գործողությունը դադարեցնելու համար, որը սահմանափակում է Ադրբեջանին ԱՄՆ-ի կողմից պետական մակարդակով օգնության տրամադրումը: Նա այս մասին ասել է «Ամերիկայի ձայն» հեռուստառադիոընկերությանը տված հարցազրույցում. հայտնում է ТАСС-ը:

«Այդ դրույթը հաստատվել է Կոնգրեսի կողմից: Իշխանության գործադիր ճյուղը պարտադիր չէ, որ նույն քաղաքական գիծն ունենա, և մեր Սահմանադրության համաձայն՝ իրականում հենց նախագահն է որոշում երկրի արտաքին քաղաքական ուղեգիծը»,- ասել է Բոլթոնը: