Հույս ունենք, որ Հայաստանը շուտով կշարունակի ԼՂ հակամարտության հարցով բանակցությունները. Մամեդյարով

Ադրբեջանի ԱԳՆ ղեկավար Էլմար Մամեդյարովը РИА Новости-ին տված հարցազրույցում անդրադարձել է նաև  ԼՂ հակամարտության թեմային: Նա նշել է, որ Ադրբեջանը պատրաստ է առարկայական բանակցությունների շարունակմանը հակամարտության փուլային կարգավորման գործընթացը սկսելու նպատակով:

«Դուշանբեում ԱՊՀ ղեկավարների վերջին  գագաթաժողովի շրջանակում Ադրբեջանի նախագահի և Հայաստանի վարչապետի միջև բարձր մակարդակով կայացած զրույցը ցույց է տալիս Ադրբեջանի՝ բովանդակալից երկխոսություն վարելու պատրաստակամությունը: Ցավոք, Երևանում տեղի ունեցած իշխանափոխությունն ու մինչև օրս  նկատվող քաղաքական ոչ կայուն վիճակը որոշակիորեն արգելակել են բանակցային գործընթացը: Հույս ունենք, որ Հայաստանի ղեկավարությունը մոտ ապագայում կկարողանա քաղաքական կամք դրսևորել գործող ձևաչափով ու արդեն հայտնի օրակարգի հիման վրա բանակցային գործընթացը շարունակելու համար»,- ասել է Ադրբեջանի ԱԳՆ ղեկավարը: