Բազմաթիվ սոցիալական ծրագրերում կոռուպցիոն ռիսկեր, միջոցների վատնում և շորթում կա. առաջին փոխվարչապետ

Այսօր կառավարության նիստում աշխատանքի և սոցիալական հարցերի նախարար Մանե Թանդիլյանը ներկայացրեց «Զբաղվածության մասին» օրենքում փոփոխություններ և լրացումներ կատարելու որոշման նախագիծը:

Նախագծով նախատեսվում է զբաղվածության քաղաքականության բարեփոխումներ իրականացնել, հստակեցվում է աշխատաշուկայում անմրցունակության որոշարկման չափանիշները, վերականգնվում են կասեցված ծրագրերը, մեծացվում է ծրագրերի հասցեականությունը, ինչպես նաև հատուկ դայակների ինստիտուտի կիրարկումը:

Առաջին փոխվարչապետ Արարատ Միրզոյանը հավելեց, որ ներկայում ունեն 14 ծրագիր, առաջարկվում է 15-րդը, սակայն այդ ծրագրերի մեծ մասում արձանագրվել են կոռուպցիոն ռիսկեր, պետական միջոցների ուղղակի վատնում և շորթում: Այդ ծրագրերի թվում են, օրինակ, աշխատանքի տոնավաճառների կազմակերպման, գործազուրկներին վերաբերող ծրագրերը և այլն: «Այս տասնչորս ծրագրի առումով մենք լրջագույն խնդիր ունենք»,- ասաց նա: