Բա ի՞նչ էիք ուզում, առանց ծրագիրը լսելո՞ւ որոշում կայացնեին. Մարուքյանը` ՀՀԿ-ի հայտարարության մասին

Կոչ եմ անում քվեարկել հանուն կայունության, հանուն այս ճգնաժամի լուծման, հանուն մեր պետության հետագա զարգացման, հանուն այսօրվա քաղաքացիական զարթոնքի կապիտալիզացիայի. խորհրդարանում լրագրողներին ասաց «Ելք» խմբակցության պատգամավոր Էդմոն Մարուքյանը: Նա հույս հայտնեց, որ այսօր իր գործընկները կանեն այս քայլը:

«Այսօրվա քվեարկությունը շատ կարևոր է, մենք իրավունք չունենք այս կուտակված հույսերը թողնել և ևս 7 օր ունենալ նույն իրավիճակը: Սա պետք է ավարտվի և պետք է ավարտվի` Նիկոլ Փաշինյանին վարչապետ ընտրելով»,- ասաց Մարուքյանը:

Նա միևնույն ժամանակ նշեց, որ ՀՀԿ-ն հրաշալի ընդդիմություն կլինի, ավելին՝ արդեն իսկ կա: «Երեկվա հարցուպատասխանը դրա վառ վկայությունն էր: Շատ պատրաստված ու պրոֆեսիոնալ էին: Նախանձելի ընդդիմություն է»,- ասաց Մարուքյանը:

Անդրադառնալով ՀՀԿ-ի այն հայտարարությանը, որ նախ պետք է իմանան Փաշինյանի ծրագիրը, հետո որոշեն` ինչպես քվեարկել, պատգամավորն ասաց. «Նորմալ է, բա ի՞նչ էիք ուզում, առանց ծրագիրը լսելո՞ւ որոշում կայացնեին: Շատ նորմալ հայտարարություն են արել, դա նշանակում է, որ կլսեն և կընտրեն: Ո ոչ մի խնդիր չեմ տեսնում»: