Ռուսաստանում մեկնարկել են Արամ Խաչատրյանի մասին ֆիլմի նկարահանումները

ՌԴ Յարոսլավլ քաղաքում մեկնարկել են «Սուսերով պար» ֆիլմի նկարահանումները, որը հանրահռչակ հայ կոմպոզիտոր Արամ Խաչատրյանի մասին առաջին լիամետրաժ գեղարվեստական ֆիլմն է: Այս մասին Русарминфо-ի հետ զրույցում ասել է ֆիլմի պրոդյուսեր Տիգրան Մանասյանը:

 Յարոսլավլում նկարահանումներն ավարտելուց հետո նկարահանող խումբը 2018-ի ապրիլին կուղևորվի Հայաստան. նկարահանումները տեղի կունենան Երևանում, Դիլիջանում և Խոր Վիրապում:

Մանասյանի խոսքով` ֆիլմի հիմնական գործողությունները տեղի են ունենում 1942 թվականին, երբ Կիրովսկի (Մարիինյան) թատրոնը տարհանվել էր Ուրալ, որտեղ Արամ Խաչատրյանն ավարտեց «Գայանե» բալետը: Իրադարձությունները զարգանում են նաև Հայաստանում, որտեղ 1939 թվականին կոմպոզիտորը գրել է «Երջանկություն» բալետը: