Դավոսի համաժողովի արդյունքները ներկայացնել շահագրգիռ մարմիններին. հանձնարարական

Այսօր կառավարության նիստում վարչապետ Կարեն Կարապետյանը հանձնարարական տվեց Դավոսում անցկացված համաշխարհային տնտեսական համաժողովում արդյունքների վերաբերյալ: Համաժողովի շրջանակներում տեղի են ունեցել մի շարք հանդիպումներ օտարերկրյա պետությունների բարձրաստիճան պաշտոնյաների, միջազգային ֆինանսական կառույցների և խոշոր ընկերությունների ղեկավարների հետ, որոնց արդյունքում ձեռք են բերվել պայմանավորվածություններ, նախանշվել են համագործակցության ուղղություններ:

Ելնելով վերոնշյալից` վարչապետը հանձնարարեց կառավարության աշխատակազմի ղեկավարին, ռազմավարական նախաձեռնությունների կենտրոնին, Հայաստանի զարգացման հիմնադրամի գործադիր տնօրեններին` 7-օրյա ժամկետում այցի արդյունքների մասին հաշվետվությունը և ընդհանուր տեղեկատվությունը փոխանցել շահագրգիռ մարմիններին:

ՀՀ ԱԳ, տնտեսական զարգացման և ներդրումների, էներգետիկ պաշարների, գյուղատնտեսության, տրանսպորտի, կապի և ՏՏ նախարարներին, ռազմավարական նախաձեռնությունների կենտրոնին հանձնարարվեց ձեռնարկել միջոցներ այցի ընթացքում ձեռք բերված պայմանավորվածությունների` կոնկրետ ժամկետներում կատարման և համագործակցության ուղղությունների զարգացման նպատակով: