Հալեպում մեծ շուքով նշվել է քաղաքի ազատագրման մեկամյակը. լուսանկարներ

Մեկ տարի առաջ՝ այս օրը, երկար սպասումից հետո ԻՊ ահաբեկչական խմբավորման տիրապետությունից ազատագրվեց Սիրիայի հայաշատ Հալեպ քաղաքը:

Երեկ Հալեպում տոնական մթնոլորտ է տիրել: Հազարավոր քաղաքացիներ հավաքվել են Սաատալլա ճապրի հրապարակում և իրենց զորակցությունը հայտնել սիրիական բանակին ու երկրի նախագահին: Տոնախմբության մասնակիցները պարզել են Հալեպի նահատակների և Սիրիայի նախագահ Բաշար ալ Ասադի պատկերները:

Տոնակատարության ընթացքում ելույթով հանդես եկած՝ երկրի տեղեկատվության հարցերով նախարար Մուհամմեդ Ռամեզ Թարճմանն ասել է. «Յուրաքանչյուր պարկեշտ քաղաքացու իրավունքն է հպարտ զգալ այս հաղթանակով»:

Իր հերթին ելույթով է հանդես եկել նաև Հալեպի նահանգապետ Հուսեյն Տիապը: «Հալեպի հաղթանակը անկյունադարձային է եղել ահաբեկչության դեմ Սիրիայի մղած պայքարում՝ ի հայտ բերելով սիրիական բանակի և նրա դաշնակից ուժերի զինվորական կարողությունը»,- ասել է նա: