Իմ որդին 15 տարեկան է. Նահապետյանը` որդու` չծառայելու վերաբերյալ լուրերի մասին

ԱԺ պաշտպանության և անվտանգության հարցերի մշտական հանձնաժողովի նախագահ, պատգամավոր Կորյուն Նահապետյանը «ստահոդ» որակեց մամուլում հրապարակված այն լուրերը, թե իր որդին նշանակվել է Մալաթիա-Սեբաստիա վարչական շրջանի ղեկավարի աշխատակազմի քարտուղարի պաշտոնակատար:

Հրապարակման մեջ նաև ասվում էր, թե ինչպես Կորյուն Նահապետյանը, այնպես էլ նրա 25-ամյա որդին չեն ծառայել Հայոց բանակում:

«Ակնհայտ սուտ տեղեկություններ են տարածվում, այնպիսի տեղեկություններ, որոնք որևէ աղերս չունեն իրականության հետ: Եթե ձեզ որևէ տեղեկություն հետաքրքիր է, ապա պետք է նախօրոք ճշտել և ստանալ պարզաբանում»,- ասաց Նահապետյանը:

Հարցին` որդին ծառայե՞լ է, նա պատասխանեց. «Ես 25 տարեկան որդի չունեմ, ակնհայտ սուտ է: Իմ որդին 15 տարեկան է»:

Իսկ հարցին ի պատասխան` արդյո՞ք ծառայելու է նրա որդին, Նահապետյանը հորդորեց ժամանակից առաջ չընկնել և սպասել: